Нүдний доод зовхи хэсгээр хөхрөх нь олон шалтгаантай байдаг.
1. хүчилтөрөгчийн дутагдал
2. архаг ядаргаа
3. В12, Д витамин, төмөр, Омега-3 дутагдал байдаг.
Сүүлийн үед олон хүн “нойр авсан ч ядаргаа арилахгүй байна” гэж ярьдаг. Өглөө босоход нүдний доогуур хөх туяа тодорч, царай гундуу харагдах нь бие махбод удаан хугацаанд амралтгүй явсны дохио байж болно. Архаг ядаргаа нь зөвхөн ажлын ачааллаас бус, удаан хугацааны бухимдал, нойр дутуу байдал, хөдөлгөөний хомсдол, буруу хооллолтоос үүдэлтэй.
Нүдний доорх арьс нимгэн тул цусны эргэлт саарах, хүчилтөрөгчийн хангамж багасах үед хөхөвтөр туяа илүү тод харагддаг. Мөн бөөр, зүрх судасны ачаалал ихсэхэд ч ийм шинж илэрч болзошгүй гэж уламжлалт анагаах ухаанд тайлбарладаг. Анагаах ухааны дөрвөн үндэс-т хүний биеийн эрхтэн хоорондоо нарийн шүтэлцээтэй, нэг хэсгийн тэнцвэр алдагдвал нөгөөд нь илэрдэг хэмээн өгүүлсэн байдаг.
Ядаргааг тайлахад заавал үнэтэй эмчилгээ шаардлагагүй. Хамгийн энгийн бөгөөд үр дүнтэй аргын нэг бол хөлийн био идэвхт цэгүүдээ идэвхжүүлэх юм. Дорно дахины онолд хөлийн уланд дотор эрхтэнүүдийн тусгал цэгүүд байрладаг гэж үздэг. Шар судар-т ч мөн хөлийн уланд иллэг хийх нь цусны эргэлтийг дэмжиж, “хий, шар, бадган”-ы тэнцвэрийг зохицуулна гэж тэмдэглэсэн байдаг.
Орой унтахын өмнө 10–15 минут хөлийн био идэвхт цэгүүдээ идэвхжүүлээрэй. Бүлээн усанд дүрж амраасны дараа тос түрхэн ул, өсгий, хуруу хооронд зөөлөн дарж илнэ. Ялангуяа хөлийн төв нум хэсэг болон өсгийг дугуй хөдөлгөөнөөр илэх нь тайвшруулах үйлчилгээтэй. Ингэснээр мэдрэлийн ачаалал буурч, бие сэтгэл амардаг.
Хөлдөө иллэг хийх нь зөвхөн ядаргаа тайлаад зогсохгүй нойрыг сайжруулж, өглөөний хавагнал багасгаж, нүүрний өнгийг сэргээхэд тустай. Биеийн доод хэсгээс цусны эргэлтийг идэвхжүүлэх нь бүх биеийн энергийг жигд хуваарилахад нөлөөлдөг.
Энэхүү мэдээлэл нь зөвхөн ерөнхий мэдээ, мэдээлэл өгөх зорилготой бөгөөд мэргэжлийн эмчийн зөвлөгөөг орлохгүй. Эрүүл мэндийн асуудалтай бол эмч эсвэл мэргэжлийн байгууллагад хандахыг зөвлөж байна.
Эх сурвалж: Gertee Massage
